- Itzulia Basque Country-ren 92. edizioak 992,5 km izango ditu
- Ez da erlojupekorik izango
Gaur, otsailak 15, Itzulia 2023ko ibilbide ofiziala aurkeztu da. Aurkezpena Eibarko udaletxeko osoko bilkuren aretoan egin da. 2023ko Kirolaren Europar Hiri izendatu duten herri horrek lasterketaren azken etapa hartuko du. Lasterketaren 62. edizioak ez du erlojupeko etaparik izango, eta, ondorioz, handitu egin da Eibarko azken helmugara iristeko egin beharreko kilometro-kopurua.
Itzulia 2023ko ibilbidea Julian Erasok eta Roberto Laisekak aurkeztu dute Eibarko alkate Jon Iraolarekin eta kiroletako zinegotzi Ander Curielekin batera. Itzulia apirilaren 3tik 8ra jokatuko da, eta 992,5 km izango ditu. Ibilbideak Araba, Nafarroa, Gipuzkoa eta Bizkaia zeharkatuko ditu, ordena horretan, eta Eibarko erdigunean amaituko da.
Edizio honetan, 26 mendate puntuagarri izango dira: 1. mailako 3, 2. mailako 7 eta 3. mailako 16.
Itzuliako zuzendari tekniko Roberto Laisekak etapa bakoitza aztertzen du:
1. etapa: VITORIA/GASTEIZ-BASTIDA, 165,40 km
Itzulia 2023ko lehen etapan Opakua mendatea igoko dute, non mendiko lehen maillota lehiatuko baita. Puntu horretatik aurrera, errepide estuak eta oso bihurgunetsuak hartuko dituzte, Bastidako esprintetik igaro arte.
Ondoren, protagonista airea izan daiteke. Teorian, etapa egokia da esprintean bukatzeko.
2. etapa: VIANA-LEITZA, 193,80 km
Itzulia honetako etaparik luzeena da. Lehen zatia, Leitzatik igaro artekoa, ihesaldia egiteko aproposa da. Bigarren zatiari dagokionez, zirkuitu bat da, eta liderrak aurrean kokatu beharko dira. Izan ere, errepideak bihurgunetsuak dira eta klimatologia erabakigarria izan daiteke, jaitsiera oso luzeak daudelako.
3. etapa: ERRENTERIA-AMASA/VILLABONA, 153,90 km
Ziur aski, Gipuzkoako kostaldeko zati handi bat zeharkatuko duen etapa honek irteera oso azkarra izango du. Amasa-Villabonatik igaro ostean, zirkuitu gogor bat hasiko da; errepide estuak izateaz gain, gora eta behera ibiliko dira etengabe. Ondorioz, tropelean tentsio handia egongo da, liderrak buruan kokatzeko. Bukatzeko, azken kilometro oso lehergarri eta gogor bati ekingo diote, Hikara iritsi arte.
4. etapa: SANTURTZI-SANTURTZI, 175,70 km
Enkarterrietako ohiko etapa, ihesaldientzako egokiak diren igoera eta jaitsiera askorekin. Azken partean, La Asturiana mendatea igo eta Zugaztietara jaitsiko dira, eta, aurreko urteetan bezala, azken zati hori erabakigarria izan daiteke.
5. etapa: AMOREBIETA/ETXANO-AMOREBIETA/ETXANO, 165,90 km
Etapa zail honetan, zuzendariek peoiak mugitzeko aukera izango dute. Paresira arte mendate garrantzitsurik egongo ez bada ere, ibilbidea egokia izango da amaierara begira estrategiak probatzeko. Azken kilometroetan, zirkuitu batean sartuko dira, non aurrean egotea oso garrantzitsua izango baita sailkapen nagusiari begira aukerak mantentzeko.
6. etapa: EIBAR-EIBAR, 137,80 km
Itzuliako etapa nagusia, hasiera-hasieratik selektiboa eta oso zorrotza izango dena. Eguneko protagonista nagusiak sailkapen nagusiko gizonak izango dira.
Oso garrantzitsua izango da talde ona izatea etapa kontrolatzeko, aurreko edizioetan ikusi dugun bezala.
