Viana
Viana 1219an sortu zuen errege Antso Azkarrak, Nafarroako Erresuma Gaztelako erresuma mugakidetik defenditzeko. Alde zaharra ederki dago harresiek zedarritua eta hainbat gauza ditu nabarmentzekoak, hala nola Santa Maria eliza eta bere atari monumental errenazentista, San Pedro Elizaren hondakinak eta hobekien kontserbatu den harresi-eremua, begiratoki ederra baita Ebro Ibarra eta Arabar Errioxa ikusteko.
Gorabehera historikoek eraginda, Viana Nafarroako Erresumako Printzerriko burua izan zen eta Cesar Borgia Errenazimenduko gizon handiaren hilobia. Donejakue Bideak gurutzatua, Foruen Plaza bertako jendearen, turisten eta erromesen topagunea da, plaza hori ere kale nagusien bidegurutzea baita.
Karrikaz karrika gabiltzala, barroko garaiko jauretxe ugari ikusi eta pintxo goxoak dastatuko ditugu, ostalaritzak prestaturiko eskaintza oparoa baita. Halaber, herriko upategietako ardoak edateko parada izanen dugu, guztiak ere Errioxa Sor Markaren baitan sartuak.
Leitza
Leitza herri txiki bat izanik, hainbat diziplinatako kirolari handiak eman ditu. Oro har, kirolarekiko zaletasun handia dago, eta, jakina, baita txirrindularitzarekiko ere. Horregatik, Itzuliaren parte izatea, mundu osoan oihartzuna duen kirol ekitaldi batean alegia, oso garrantzitsua da guretzat, eta badakigu modu batera edo bestera herriaren zati handi bat inplikatuko dela ospakizun honetan.Bestalde, pandemiak eragin handia izan du gure udalerriko jarduera sozialean, kulturalean eta ekonomikoan, eta uste dugu horrelako ekitaldi batek ere bere eragina izango duela jendearen gogoan, bai eta tokiko jardueran ere.
Leitza bizi-bizia, aberatsa, euskalduna, anitza, naturazalea, historiaz betea, abegitsua eta askoz gehiago da. Apirilean gure herrira hurbiltzen direnek hori sentitzea nahi genuke. Ingurune ederrak ditugu, zorionez, eta haiek ere munduko txoko ezberdinetako ikusleei erakutsi ahal izatea plazerra izanen da guretzat.
Leitza herri parte-hartzailea da eta, ildo horretan, Udalean lelo bat erabili izan dugu azken urteotan, jarrera hori laburtzen duena: “Denok egiten dugu Leitza”. Apirilaren 5ean, Itzuliaren bigarren etapako irteera eta horren bueltan antolatuko ditugun gainerako ekitaldi eta ospakizunak ere, horrela izatea nahi genuke, denon artean eta denontzat.
Ongi etorri Leitzara!
