Ganguren mendiaren magalean, Bilboren eta Arratiaren artean kokatua, zer ikusi, ikasi eta gozatu asko du Galdakaok. Euskal Herriko hiriburu handienerako atea izanik, Burdin Hesiaren arrasto gehien dituen herrietakoa da: 1936ko gerran Bizkaiko hiriburua babesteko eraiki ziren trintxera eta galeriek osatutako ibilbide interesgarria du, ia zazpi kilometrokoa.
Elexalde auzoan XIII. mendeko Andra Mari eliza dago, erromanikotik gotikorako trantsiziokoa, altxor arkitektonikoa. Ibaizabalen Nafarroako erresumaren garaiko Puentelatorre eta Torrezabal zubiak aurki ditzakegu, eta baita XVIII. mendekoa den eta 4 zubi-begi dituen Merkadilloko zubia ere.
